Rhagair
Siân Morgan
Prif Swyddog Gweithredol
John Morgan
Cadeirydd, Y Bwrdd Rheoli
Mae’n bleser gennym gyflwyno adroddiad Hafan Cymru ar gyfer 2021 – ein 32ain adroddiad blynyddol. Dyna wahaniaeth y mae blwyddyn yn ei wneud – pwy feddyliai y byddem yn dal i fod o dan gyfyngiadau symud wrth i’r rhagair hwn gael ei ysgrifennu ym mis Ebrill! Bu’n rhaid i ni addasu ein harferion gweithio a mabwysiadu dulliau gweithio o bell ar gyfer y rhan fwyaf o’r busnes, ac mae pawb wedi gweithio’n galed i addasu i’r ffyrdd newydd o weithio.
Diolch i’r drefn, rydym yn sefydliad sy’n llawn pobl anhygoel sydd wedi amlygu eu hymrwymiad a’u teyrngarwch dro ar ôl tro yn ystod yr amserau heriol hyn. Rydym yn eithriadol o falch o’r holl staff a rheolwyr sydd wedi sicrhau ein bod yn parhau i ddarparu’r cymorth y mae ar bobl eu hangen – o brosiectau arbennig i gynnal a chadw a rheoli eiddo. Mae ymdrechion pawb wedi bod yn wirioneddol nodedig.
Er gwaetha’r cyfyngiadau symud, rydym yn parhau i arloesi a datblygu. Mae’r broses recriwtio wedi parhau, ond rydym wedi mynd ati mewn ffordd wahanol, gan ddefnyddio llwyfannau digidol i gynnal cyfweliadau ac asesiadau. Rydym wedi cryfhau ein tîm datblygu busnes, yn ogystal â’r ffordd yr ydym yn ymdrin â thendrau a chyfleoedd cyllido newydd. Rydym yn parhau i dynnu ynghyd fel sefydliad i ddarparu cymorth i’n gilydd, yn ogystal â chymorth ar gyfer ein cleientiaid, sy’n wynebu heriau cymhleth ac anodd bob dydd.
Byddwn yn parhau i weithio i hybu proffidioldeb ein busnes, ac i gyflawni yn unol â Fframwaith Rheoleiddiol Llywodraeth Cymru ar gyfer Cymdeithasau Tai. Byddwn yn parhau i fod yn ystyriol o’r amgylchedd gwleidyddol ac economaidd, yn ogystal â’r newidiadau posibl i flaenoriaethau y gallai llywodraeth newydd eu cyflwyno.
Gwelwyd digon o arloesedd a chynnydd yn ystod y flwyddyn ariannol ddiwethaf hefyd, a hynny mewn nifer o feysydd allweddol:
- Bu i ni sicrhau cyllid gan Lywodraeth Cymru ar gyfer dau Weithiwr Llesiant Plant a Phobl Ifanc yn Sir Benfro ac Abertawe.
- Parhaodd Gwasanaethau Hyfforddi Hafan Cymru trwy gydol y cyfyngiadau symud trwy ddarparu sesiynau ar-lein, gan ennill dros 16 o gontractau newydd i gefnogi cwsmeriaid yr Adran Gwaith a Phensiynau a’u helpu i oresgyn rhwystrau i gyflogaeth.
- Yn rhan o ymgyrch Llywodraeth Cymru i fynd i’r afael â thrais yn erbyn menywod, cam-drin domestig a thrais rhywiol, aeth Prosiect Ymgyrch Encompass Sbectrwm Hafan Cymru ati i ddarparu cymorth ac arweiniad arbenigol, rhad ac am ddim, ar gyfer disgyblion a staff cynradd ac uwchradd ledled Dyfed-Powys.
- Bu tîm gweithredol Hafan Cymru yn Abertawe yn gweithio’n agos gyda sefydliadau partner megis Cyngor Abertawe, Hwb Cam-drin Domestig, Cymorth i Fenywod Abertawe a BAWSO i sefydlu llety dros dro mewn unedau a oedd newydd ddod yn wag ym Mhrifysgol Abertawe. Defnyddiwyd y fflatiau yn llety gorlif ar gyfer y lloches cam-drin domestig neu ar gyfer unrhyw un a oedd yn dianc rhag cam-drin domestig. Bu i ni drawsnewid eiddo ym Mae Colwyn, ac agor Prosiect Pobl Ifanc, sy’n darparu llety a chymorth hanfodol wedi’u teilwra i anghenion pobl ifanc.
- Llwyddom i sicrhau cyllid i benodi cymorth arbenigol i ddarparu cwnsela MAMs (Mothers’ Affection Matters), a hynny er mwyn uwchsgilio ein staff fel y gallant gefnogi mamau a helpu i dorri’r cylch trawma a all gael ei drosglwyddo o un genhedlaeth i’r nesaf.
Ni wyddom beth a ddaw yn y dyfodol. Fodd bynnag, gwyddom fod cynnydd wedi bod o ran materion iechyd meddwl a cham-drin domestig o ganlyniad i’r pandemig, felly mae’n debygol y bydd yna dipyn o alw am wasanaethau cysylltiedig pan fydd y pandemig o dan reolaeth. Rydym eisoes yn cynllunio ymlaen ac yn ystyried ffyrdd o ehangu a thyfu ein gwasanaethau, gan hybu ein sgiliau i sicrhau ein bod yn barod i ymateb i unrhyw ddatblygiadau a allai ddod i’r amlwg.
Credwn fod gennym ddyfodol cyffrous gydag ambell adeg heriol i ddod, yn arbennig yn nhermau adnoddau ariannol sy’n lleihau a newidiadau deddfwriaethol. Fodd bynnag, mae ein strategaeth i amrywio ein ffrydiau cyllido yn parhau er mwyn sicrhau nad ydym yn ddibynnol ar un cyllidwr, sy’n allweddol i dwf Hafan Cymru yn y dyfodol.
Rydym yn falch o’r ffordd y mae’r sefydliad wedi ymateb yn ystod amserau heriol iawn, ac mae’n parhau i fod yn fraint arwain sefydliad mor wych. Nid ydym erioed wedi bod mewn cystal sefyllfa i wynebu unrhyw heriau sydd i ddod!
Yn olaf, ar ran y Bwrdd Rheoli, diolch o galon i’n cyd-weithwyr ledled y busnes am eu teyrngarwch, eu hymrwymiad a’u cadernid, i’r Comisiynwyr/Cyllidwyr am eu cymorth a’u harweiniad, i’n rhanddeiliaid am eu cymorth parhaus, ac i aelodau’r Tîm Rheoleiddio Tai am eu holl arweiniad parhaus trwy gydol y flwyddyn.
Y rheiny a gefnogwyd gennym
Cyfanswm nifer y menywod, dynion a'u teuluoedd a gefnogwyd gan Hafan Cymru:
Rydym yn rheoli
uned sy’n cynnwys prosiectau pobl ifanc, llochesi, prosiectau tai â chymorth a thai anghenion cyffredinol.
Y Rhaglen Cefnogi Pobl:
Mae'r rhaglen yn cynnig cymorth sy'n gysylltiedig â thai er mwyn helpu pobl agored i niwed i fyw mewn modd mor annibynnol â phosibl.
Mae dros 680 o fenywod, dynion a'u plant wedi cael eu cefnogi trwy'r rhaglen yn y flwyddyn ariannol ddiwethaf.
Cyfnod Clo COVID-19
Ar ddechrau’r pandemig, gwnaethom ddatblygu Cynllun Parhad Busnes Covid-19. Amlinellodd y cynllun y camau y byddai eu hangen ac ar ba gam, mesurau diogelu ac asesiadau risg. Cafodd y Cynllun ei gymeradwyo gan y Bwrdd a’n galluogi i sicrhau ein bod yn parhau i gyflawni ein contractau ledled Cymru a darparu’r gefnogaeth y mae ei hangen yn fawr ar ein cleientiaid, gan sicrhau ar yr un pryd bod ein timau’n parhau i fod yn ddiogel. Roeddem hefyd yn gallu cynhyrchu a chymhwyso cynlluniau gweithredu wrth gefn ar draws ein holl wasanaethau y cytunwyd arnynt gan ein Comisiynwyr.
Roedd mwyafrif ein staff yn gweithio gartref, wedi’u galluogi gan Office 365 a Microsoft Teams, a ganiataodd inni ddarparu cefnogaeth o bell i sicrhau ein bod yn diwallu anghenion ein cleientiaid. Fodd bynnag, lle’r oedd angen i ni gwrdd â chleientiaid wyneb yn wyneb, gwnaethom sicrhau bod arweiniad y llywodraeth yn cael ei ddilyn a bod Offer Personol Amddiffynnol (neu PPE) ar waith. Gwnaethom gadarnhau dau aelod o staff o’n darpariaeth Gwasanaethau Hyfforddi, a dychwelodd y ddau cyn gynted ag yr oeddem yn gallu cyflawni gweithgaredd masnachol o bell. Roedd ‘PPE’ yn her i ddechrau, ond diolch byth, roeddem yn gallu datrys hynny gyda chefnogaeth Cymorth Cymru a Chymuned Tai Cymru.
Fe wnaethom hefyd sefydlu ‘gwasanaeth trawma cymorth arbenigol’ anghysbell i sicrhau y byddai iechyd meddwl a lles staff a chleientiaid yn cael eu cefnogi pe bai eu hiechyd yn dirywio oherwydd y materion sy’n gysylltiedig â’r pandemig.
Roedd yr ymateb gan y busnes yn ysgubol ac ymatebodd pawb yn y gymdeithas yn gadarnhaol. Cynhaliwyd asesiadau risg yn erbyn yr holl weithgareddau a chawsom adborth rhagorol gan ein cleientiaid ynglŷn â’r gefnogaeth a’r gwasanaethau a gawsant.
Llai na
cafodd y staff eu goleuo
Ein Gwerthoedd
Mae gennym ddrws agored. Bydd pob un sy’n cael cymorth gennym yn cael ei drin yn garedig, fel unigolyn, ac yn cael mynediad cyfartal at gyfleoedd. Rydym yn ymfalchïo yn ein dull gweithredu creadigol, amlochrog a chwbl ddibynadwy. Rydym ni yma i’n gilydd ac i bob unigolyn sy’n cael cymorth gennym – ar hyd y daith. Trwy gymhwyso’r egwyddorion hyn, ein nod yw rhagori yn ein maes. Gobeithiwn ysbrydoli’r rhai o’n cwmpas a rhannu ein harferion ag eraill a’u helpu nhw i ddarparu canlyniadau cadarnhaol hefyd.
Stori Jane
(name changed)
“Gallaf wenu unwaith eto!” Dyma eiriau goroeswr a gafodd gymorth yn ystod y cyfyngiadau symud.
Cafodd Jane ei hatgyfeirio at Hafan Cymru ar gyfer llety â chymorth. Roedd yn ddioddefwr trais yn y cartref, a oedd yn byw gyda phartner a’u plant mewn cymuned wledig fach, gydag aelodau o deulu ei phartner yn byw gerllaw.
Roedd yr heddlu wedi cael eu galw ar sawl achlysur oherwydd ysbeidiau parhaus o gamdriniaeth. Pan effeithiodd y digwyddiad ar ferch Jane, cafodd y gwasanaethau cymdeithasol eu cynnwys hefyd.
Symudodd Jane i eiddo ar ddechrau’r cyfyngiadau symud. Cynhaliwyd asesiadau risg cadarn, a rhoddwyd mesurau diogelwch ar waith yn gyflym, a hynny heb aberthu ansawdd y cymorth a ddarparwyd i Jane. Roedd yn gyfnod heriol iddi, yn enwedig am fod gan deulu ei chyn-bartner ddylanwad cryf arni hi a’i phlant, a’u bod yn eu colli.
Bu i ni ei chefnogi yn ei hachos llys, ac o ran rheoli ei llety, ei chyllid, a’i llesiant corfforol a meddyliol. Aethom ati i sicrhau ei bod yn ddiogel, a’i bod yn gwybod sut i gysylltu â ni ar unrhyw adeg o’r dydd. Oherwydd yr amgylchiadau, roedd yn rhaid i lawer o’r cymorth gael ei ddarparu dros y ffôn, ond bu i ni sicrhau ein bod yn parhau i adael nwyddau hanfodol “ar stepen y drws”; a phan oedd y cyfyngiadau yn caniatáu hynny, aethom ati i gynnal “sesiynau cerdded” gyda hi.
Heddiw mae Jane a’i phlant yn byw ar eu pen eu hunain. Mae’n coginio prydau bwyd cartref, ac yn mynd am dro yn aml gyda’i phlant er mwyn hybu eu hiechyd a’u llesiant.
“Rwy’n teimlo efallai na fyddwn yn fyw heb eich cymorth chi,” meddai. “Rwy’n teimlo’n hyderus, ac yn gwybod bod gennyf y gallu i ofalu am fy nheulu ar fy mhen fy hun.”
Uchafbwyntiau
- Parhaodd cyswllt a chymorth rheolaidd ar gyfer tenantiaid ifanc yn Wrecsam, a hynny er gwaetha’r cyfyngiadau symud. Mae gardd y prosiect wedi eu cadw’n brysur ac wedi cefnogi eu hiechyd meddwl a’u llesiant.
- Ganol y cyfyngiadau symud, lansiwyd prosiect newydd yng Nghonwy, sef Prosiect Pobl Ifanc Belgrave, a hynny trwy waith tîm rhagorol a phenderfyniad. Nod y prosiect yw atal digartrefedd a hyrwyddo annibyniaeth trwy alluogi defnyddwyr gwasanaethau i feithrin sgiliau bywyd bob dydd, gan eu cefnogi i sicrhau llety cynaliadwy.
- O ganlyniad i’r canllawiau ar gadw pellter cymdeithasol, cawsom ein gorfodi i ailystyried y modd yr ydym yn sicrhau cyfranogiad tenantiaid. Ni chawsom ein siomi gan y staff, a aeth ati i ddarparu amrywiaeth o sesiynau ffitrwydd a llesiant yn yr awyr agored er mwyn ennyn diddordeb y tenantiaid a’u cadw’n weithgar.
- Profodd y Gweithwyr Cymorth fod canlyniadau da cyson yn gallu parhau er gwaetha’r heriau o ran y ffordd yr ydym yn gweithio. Aethant ati i addasu a chroesawu newid, gan ailfodelu’r cymorth yr oeddent yn ei ddarparu.
- Roedd ein tîm yn Rhondda Cynon Taf yn falch o gyflawni cyfradd lwyddo o 95% o ran tenantiaid yn symud ymlaen, sy’n golygu bod y tenantiaid wedi cael eu cefnogi i symud ymlaen i rentu llety mwy parhaol a/neu i reoli eu tenantiaeth yn well.
- Manteisiodd y timau i’r eithaf ar y defnydd o dechnoleg i gefnogi tenantiaid agored i niwed, gan feddwl bob amser am ffyrdd newydd a ffres o’u cefnogi, yn cynnwys sicrhau grantiau i bobl gael mynediad at ffonau, llechi a/neu liniaduron.
- Parhaodd y tîm yn Nhorfaen i ddarparu lefel uchel o gymorth i’r rhai mwyaf agored i niwed yn ei gymuned, gan leihau argyfyngau a sicrhau cyllid ychwanegol gan y cyngor i ehangu ei wasanaethau fel y gallem gyrraedd rhagor o bobl yn ystod y pandemig.
- Comisiynwyd gwasanaeth Cymorth Tai Integredig newydd i gynorthwyo ein tîm yn Sir Gaerfyrddin, sy’n cefnogi unigolion sy’n ddigartref yn barhaol ac sydd ag anghenion cymhleth.
Cydymffurfedd â Chod Llywodraethu Diwygiedig Cartrefi Cymunedol Cymru
Mae Cod Llywodraethu Cartrefi Cymunedol Cymru yn pennu’r egwyddorion a’r arfer a argymhellir ar gyfer llywodraethu da. Rydym yn ei ystyried yn offeryn ar gyfer gwelliant parhaus, sy’n ein helpu i gyflawni’r safonau uchaf o ran llywodraethu. Bob blwyddyn, mae Bwrdd Hafan Cymru yn mesur ac yn myfyrio ar ein cydymffurfedd â’r saith egwyddor a nodir yn y cod.
Cytunodd y Bwrdd fod Hafan Cymru wedi amlygu cydymffurfedd â’r cod, a’i fod wedi dangos amrywiaeth o welliannau oddi ar y sefyllfa yn 2019-20. Mae’r Bwrdd yn parhau i ystyried y modd yr ydym yn denu talent amrywiol mewn ymgyrchoedd yn y dyfodol i recriwtio i’r Bwrdd.
Yr hyn y mae ein cleientiaid yn ei ddweud wrthym...
Conwy
Sir Ddinbych
Sir y Fflint
Gwynedd
Castell-nedd Port Talbot
RCT
Abertawe
Torfaen
Wrecsam
Ynys Mon
Stori Carol
(name changed)
Trwy gydol pandemig COVID-19, rydym wedi clywed nifer o straeon am galedi a thrallod. Hoffem ddweud wrthych am Carol. Tra oedd Carol yn gweithio gyda ni, aeth ati i droi caledi a thrallod yn gyfle i reoli ei thynged a chreu dyfodol cadarnhaol ar ei chyfer ei hun.
Cafodd Carol ei chyflwyno i’n prosiect Plant a Phobl Ifanc yn ei gamau cynnar. Roedd newydd ddechrau yn y coleg ac roedd yn cael trafferth gwneud ei gwaith, ac roedd arni angen cymorth.
Dechreuodd Carol weithio’n dda gyda’i gweithiwr cymorth yn gyflym, gan ddweud ei bod yn teimlo’n ddiogel a’i bod yn ymddiried ynddi. Dywedodd wrthym am ei pherthynas anodd â’i mam, a oedd wedi ei gorfodi i adael ei chartref. Bu’n ‘syrffio ar soffas’ am gyfnod, ac roedd hyn wedi cynyddu ei gorbryder ac effeithio ar ei gwaith coleg.
Er gwaetha’r heriau a ddaeth y sgil y pandemig, rhoesom y cymorth yr oedd arni ei angen i Carol. Roeddem wedi gallu cael llechen iddi trwy gais llwyddiannus am grant. Aethom ati i gynnal sesiynau rhithwir, gan ei helpu i ddeall perthnasoedd iach, ac i wneud defnydd rheolaidd o wasanaethau negeseua er mwyn rhoi iddi’r tawelwch meddwl gofynnol fel y gallai wneud cynnydd.
Pan ddaeth yn glir na fyddai’n gallu mynd adref at ei mam, aethom ati i helpu Carol i ddod o hyd i lety trwy ein Prosiect Tai Pobl Ifanc. Roedd hyn, ochr yn ochr â chymorth parhaus, wedi rhoi lle diogel iddi gwblhau ei gwaith cwrs, ac wedi ei galluogi i feithrin annibyniaeth a dysgu sgiliau bywyd gwerthfawr.
Mae Carol yn gwneud yn dda erbyn hyn, mae ei gorbryder wedi lleihau, ac mae wedi cael lle yn y brifysgol i astudio ei chwrs delfrydol.
Da iawn Carol!
Sbectrwm
Mae Prosiect Sbectrwm yn gweithio ym mhob ysgol gynradd ac uwchradd yng Nghymru, yn mynd i’r afael â cham-drin domestig a materion cysylltiedig trwy addysg. Mae’n addysgu pwysigrwydd perthnasoedd iach ac yn gweithio gyda phlant, pobl ifanc ac oedolion i feithrin ymwybyddiaeth o drais yn erbyn menywod, cam-drin domestig a thrais rhywiol (VAWDASV).
Mae’r tîm Sbectrwm yn cynnig sesiynau dwyieithog, priodol i oedran, sy’n canolbwyntio ar y plentyn, i ddisgyblion, ynghyd ag arweiniad a hyfforddiant i staff ysgolion.
Lansiwyd gwefan newydd Sbectrwm ym mis Mawrth 2021. Mae’n cynnwys gwybodaeth werthfawr i athrawon, ysgolion a’u cymunedau, ynghyd â chatalog o adnoddau dwyieithog, priodol i oedran, sydd ar gael i’r holl staff mewn ysgolion.
Sbectrum
Cyfanswm y plant y cyrhaeddwyd atynt
Cyfanswm yr oedolion y cyrhaeddwyd atynt mewn Sesiynau
Cyfanswm yr oedolion a gafodd Hyfforddiant
Cyfanswm nifer y sesiynau
- Mae’n sesiwn hwylus iawn gyda llawer o wybodaeth a sgyrsiau/enghreifftiau perthnasol.
- Addysgiadol iawn, ac wedi’i chyflwyno’n dda.
- Mae angen i fwy o bobl fod yn ymwybodol o beth yw cam-drin domestig a beth yw’r arwyddion.
- Rhoddodd fwy o ymwybyddiaeth i mi.
- Wedi’i chyflwyno’n dda iawn, a deilliannau clir.
- Staff agos-atoch a chynnwys addysgiadol.
- Roedd y fenyw a oedd yn arwain y sesiwn yn frwdfrydig iawn.
- Yn hygyrch, ac mae yna lawer o adnoddau ychwanegol y gellir eu defnyddio.
- Addysgiadol iawn, yn fwy abl i adnabod yr arwyddion a beth i’w wneud.
- Roedd yn ddefnyddiol, ac wedi sicrhau bod pob un ohonom yn ymwybodol o’r dull ysgol gyfan.
- Yn llawn dop o wybodaeth bwysig a defnyddiol nad yw pobl yn gwybod amdani, o bosibl.
- Oherwydd ei bod yn wirioneddol addysgiadol ac wedi’i gwneud mewn ffordd sensitif o ystyried pwnc yr hyfforddiant, rwy’n meddwl ei bod wedi’i chyflwyno’n dda iawn.
- Clir a chryno – yn mynd at wraidd y broblem ac yn cynnig syniadau o ran y modd y gallwn helpu disgyblion.
- Roedd yna wybodaeth bwysig a gafodd ei chyflwyno mewn dull clir a phriodol.
Siediau Dynion Cymru
Sicrhawyd rhagor o gyllid i barhau â’r prosiect hwn hyd at ddiwedd 2021, ac rydym wedi llwyddo i greu rhwydwaith hyfyw, sefydlog o grwpiau Siediau Dynion ar hyd a lled Cymru. Mae’r rhain yn fannau diogel, croesawgar, sy’n agored i bob dyn yn y gymuned ddod i gysylltu, sgwrsio a chreu. Yn ogystal â darparu lle i gwrdd a chymryd rhan mewn gweithgareddau, rydym hefyd wedi parhau i feithrin ymwybyddiaeth o fuddion cymdeithasol ac iechyd Siediau Dynion o ran lleihau arwahanrwydd ac unigrwydd, ac o ran grymuso cymunedau lleol.
Ein prif ffocws eleni oedd datblygu Siediau Dynion newydd, helpu siediau sy’n bodoli i barhau i ymgysylltu ac aros yn agored, a hyrwyddo’r cysyniad o Siediau Dynion yn offeryn cadarnhaol i fynd i’r afael ag unigrwydd ac arwahanrwydd.
Bu i COVID-19, ynghyd â’r cyfyngiadau cysylltiedig o ran cyfarfodydd wyneb yn wyneb a theithio, gwtogi cyn pryd ar y gwaith o ddatblygu grwpiau newydd yn 2020. Er gwaethaf hynny, datblygwyd saith grŵp newydd ddechrau’r flwyddyn. Yn ystod 2020, daeth 16 yn rhagor o grwpiau cryf posibl i’r amlwg, ond ni allodd y prosiect eu cynorthwyo hyd at aelodaeth lawn oherwydd y rheolau ynghylch cadw pellter cymdeithasol.
Yn ystod 2020, cadwyd mewn cysylltiad â Siediau Dynion a chynhaliwyd diddordeb ynddynt, a hynny trwy gylchlythyr a chyflwyniadau ar-lein trwy Zoom. Ffocws y prosiect oedd cynnal y cysylltiadau hyn â siediau a rhyngddynt. Mae’r prosiect wedi manteisio ar ei enw da o fod yn ddarparwr gwybodaeth y gellir ymddiried ynddo i ddarparu canllawiau ar agor a defnyddio mangreoedd, ac i ddosbarthu gwybodaeth gyhoeddus am y modd i gadw’n ddiogel yn ystod y pandemig.
Nifer y Siediau Dynion newydd a grëwyd mewn cymunedau ledled Cymru
Nifer yr aelodau presennol ac aelodau newydd sydd gan Siediau Dynion mewn cymunedau ar hyd a lled Cymru
Cyfanswm nifer y dynion sy'n dweud eu bod yn teimlo'n llai ynysig yn gymdeithasol o ganlyniad uniongyrchol i gymryd rhan mewn Sied Dynion sy'n bodoli neu un newydd ei greu
Cyfanswm nifer y dynion sy'n dweud eu bod yn teimlo eu bod ‘heb lais’ neu fod ganddynt ‘rwystrau i ymgysylltu’ ac sydd wedi cael eu cefnogi gan Siediau Dynion
Nifer y mannau lleol (adeiladau neu fannau gwyrdd) sy'n cael eu gwella neu eu hadfywio'n uniongyrchol fel lleoliad ar gyfer Siediau Dynion
Nifer y mudiadau newydd sy'n cydweithredu â Phrosiectau Siediau Dynion Cymru a'r rhwydwaith ‘siediau’ er mwyn cynyddu'r gwaith o ledaenu gwybodaeth am iechyd a llesiant
Nifer y ‘pwyntiau gwybodaeth’ iechyd a llesiant newydd a grëwyd mewn cymunedau yng Nghymru
“Rwy'n gwerthfawrogi eich galwad mewn wythnos a fyddai wedi bod yn wag ac yn unig.’’
Gwasanaethau Hyfforddi Hafan Cymru
Rydym yn cynnig amrywiaeth eang o ddatrysiadau o ran hyfforddiant a chyflogadwyedd ar gyfer ein cwsmeriaid, gan gynnwys cyrsiau craidd ar bynciau megis ymwybyddiaeth o gam-drin domestig, ymddygiad o reolaeth trwy orfodaeth, camfanteisio’n rhywiol ar blant, anffurfio organau cenhedlu benywod, a diogelu. Mae’r rhain yn arbennig o addas i gyflogeion yn y sectorau gwirfoddol, statudol a phreifat sy’n gweithio mewn rôl gyhoeddus. Rydym yn cysylltu’n agos â chwsmeriaid a phartneriaid i sicrhau bod ein darpariaeth bwrpasol yn bodloni eu hanghenion, a’i bod yn cael effaith gadarnhaol ar y rhai sy’n elwa ar y ddarpariaeth honno.
Ym mis Tachwedd 2020, roeddem wrth ein bodd o gael cyflawni Marc Ansawdd Agored Cymru am ein cwrs Pontio’r Bwlch mewn partneriaeth â Chonsortiwm Seren Môr.
Hyfforddiant: ffeithiau a ffigurau
Trwy gydol 2020-21, cyflwynodd COVID-19 nifer o heriau i’n tîm hyfforddi, gan gyflymu’r defnydd o dechnoleg i gyflwyno modiwlau hyfforddi diddorol a hygyrch.
Rydym yn mesur y pellter a deithiwyd yn ystod yr hyfforddiant er mwyn nodi’r cynnydd mewn gwybodaeth a dealltwriaeth. Mae’r enghraifft isod yn dangos gwybodaeth gyfartalog o 4.7 cyn cael hyfforddiant, a thwf hyd at 9.7 yn dilyn hyfforddiant.
Gwasanaethau Cyflogadwyedd a Llesiant
Newidiodd ein ffordd o gyflawni prosiectau cyflogadwyedd a llesiant dros nos o ganlyniad i COVID-19. Mae ymgysylltiad ein cwsmeriaid wedi cynyddu, fel y mae’r canlyniadau cadarnhaol ar gyfer y rhai sy’n cymryd rhan.
Ffeithiau a ffigurau
Enillwyd
o gontractau gan yr Adran Gwaith a Phensiynau – goresgyn rhwystrau i gyflogaeth
Ymgysylltwyd â dros
o gwsmeriaid canolfannau gwaith
Cyflawnodd
o'r cwsmeriaid eu nodau.
Cyflogadwyedd a Llesiant Cyngor Gweithredu Gwirfoddol Cymru
Yn ystod 2020-21, roedd ein rhaglen Cynhwysiant Gweithredol, a ariennir gan Gyngor Gweithredu Gwirfoddol Cymru (CGGC), wedi darparu cymorth i unigolion â chyflyrau iechyd sy’n cyfyngu ar waith, gan greu strategaethau i’w helpu i ddatblygu a symud ymlaen at waith.
Ffeithiau a ffigurau
canlyniadau cadarnhaol
wedi symud ymlaen i ddysgu pellach, cyflogaeth, gwirfoddoli a/neu chwilio am swydd
wedi cael tystysgrifau sy'n berthnasol i waith a/neu gymwysterau eraill
Yn ystod y pandemig, bu i ni adnabod angen i ddarparu cymorth emosiynol a llesiant ar gyfer ein cwsmeriaid ac unigolion yn y gymuned. Roedd Cyngor Gweithredu Gwirfoddol Cymru wedi ein hariannu trwy Gronfa Argyfwng y Gwasanaethau Gwirfoddol i gyflawni prosiect Llesiant a Chydnerthedd, gan ddarparu gwasanaeth o bell ar gyfer y rhai a oedd yn wynebu problemau ac arwahanrwydd yn ystod pandemig COVID-19.
Prosiectau Cynghorwyr Annibynnol ar Drais Domestig (IDVA)
Mae gan Hafan Cymru brosiectau Cynghorwyr Annibynnol ar Drais Domestig (IDVA) sy’n darparu cyngor, gwybodaeth a chymorth i rai sydd wedi goroesi trais domestig, a hynny mewn partneriaeth â Swyddfeydd Comisiynwyr Heddlu a Throseddu Dyfed Powys ac Awdurdodau Lleol Sir Gaerfyrddin, Sir Benfro, Ceredigion a Phowys.
o bobl wedi cael cymorth trwy brosiectau Cynghorwyr Annibynnol ar Drais Domestig (IDVA) ledled Dyfed-Powys a Chonwy.
Partneriaeth SafeLives
Mae SafeLives yn elusen wedi’i lleoli yn y DU sy’n gweithio ym maes cam-drin domestig. Rydym yn parhau i ddarparu cymwysterau blaenllaw SafeLives, sef Cynghorwyr Annibynnol ar Drais Domestig (IDVA) a Rheolwyr Gwasanaethau, a hynny mewn partneriaeth â SafeLives ac wedi’i ariannu gan Lywodraeth Cymru.
Wrth Ymadael â Hafan Cymru roedd
yn adrodd am welliant o ran eu hiechyd a'u llesiant
yn teimlo'n fwy diogel ar ôl cael ein cymorth
yn teimlo bod eu gallu i ymgymryd â hyfforddiant neu ddod o hyd i waith wedi gwella
yn teimlo bod eu hyder a'u hunan-barch wedi cynyddu o ganlyniad i gymorth
yn dweud bod ganddynt fwy o hyder o ran gofalu am eu plant
yn teimlo'n fwy hyderus i fyw'n annibynnol a rheoli cartref
Prosiect Cymorth yn y Cartref Teuluoedd yn Gyntaf
Rhaglen Llywodraeth Cymru yw Prosiect Cymorth yn y Cartref Teuluoedd yn Gyntaf, sydd wedi’i gynllunio i wella bywydau plant, pobl ifanc a theuluoedd. Mae’r rhaglen yn hyrwyddo mwy o weithio amlasiantaethol ac ymyraethau cynnar er mwyn sicrhau bod teuluoedd yn cael cymorth cydgysylltiedig pan fo arnynt ei angen, gyda’r nod o atal problemau rhag gwaethygu.
Rydyn ni’n darparu rhaglenni teuluoedd yn gyntaf yng Nghastell-nedd, Port Talbot a Thorfaen. Rydyn ni’n darparu sgiliau rhianta, cynorthwyo i gryfhau perthnasau a nodi unrhyw gefnogaeth ychwanegol sydd angen ar deuluoedd i gael perthnasau iach ac i fod yn hyderus, anogol a gwydn.
Yn ystod y cyfyngiadau symud, aethom ati i addasu ein gwasanaeth trwy ddarparu cymorth dros y ffôn ar gyfer ein holl gleientiaid, ynghyd â chymorth diogel wyneb yn wyneb ar gyfer y rhai a oedd mewn argyfwng. Buom yn dosbarthu parseli bwyd i’r rheiny yr oedd arnynt eu hangen. Roeddem hefyd yn llwyddiannus o ran ein cais am grant i ddarparu cyfarpar celf a chrefft a garddio i’n teuluoedd i gefnogi eu llesiant meddwl yn ystod y cyfnodau hyn.
Cefnogir dros
o deuluoedd gan ein prosiectau Teuluoedd yn Gyntaf.
Siop Un Stop Abertawe
Mae’r Siop Un Stop ar gyfer Camdriniaeth Ddomestig yn Abertawe yn brosiect partneriaeth sy’n cynnwys Hafan Cymru, Cymorth i Fenywod Abertawe, BAWSO a Dinas a Sir Abertawe. Mae’r holl bartneriaid wedi’u cyd-leoli yn y Siop Un Stop er mwyn gwneud y gorau o’r gwaith o ddarparu gwasanaethau, gyda Hafan Cymru yn asiantaeth arweiniol.
Ni ataliwyd y gwasanaeth hanfodol hwn yn ystod y cyfyngiadau symud; parhaodd y gwasanaeth galw heibio dros y ffôn. Cafodd y ffonau yn swyddfa’r Siop Un Stop yn Abertawe eu dargyfeirio i aelodau’r tîm er mwyn sicrhau bod pob galwad yn cael ei ateb. Aethom ati i gynnal y Rhaglen Rhyddid yn rhithwir, gan helpu i leihau’r rhestr aros. Buom yn dosbarthu parseli bwyd, dillad a hanfodion eraill yr oedd ar gleientiaid eu hangen. Trwy gydol y cyfyngiadau symud cyntaf, aethom ati i ddarparu pecynnau rhianta, a oedd yn cynnwys gweithgareddau addysgol i blant, a gweithgareddau lles i’r oedolion.
“Mae’r cymorth wedi fy helpu mewn sawl ffordd: i ymgartrefu mewn ardal a fflat newydd, gyda ffurflenni a sefydlu budd-daliadau, a thrwy fy nghyflwyno i grwpiau gwahanol er mwyn cwrdd â phobl newydd a gwneud ffrindiau. Hefyd i ddilyn cyrsiau i helpu gyda’m hyder. Mae Gemma wedi bod yn wych.”
Cleient Siop Un Stop Abertawe
• Coffi a Chrefft
• Cydbwysedd
• Rhaglen Rhyddid
• Siop Gyfnewid
Ein Pobl
Mae gennym ni 140+ o weithiwr. Mae pob un ohonynt yn dod a’u rhinweddau unigryw eu hun i’n cynorthwyo i gyflawni pethau rhyfeddol.
Bu i’r Gwasanaethau Pobl, sef yr adran sy’n cefnogi proses recriwtio, datblygiad, iechyd a llesiant gweithlu Hafan Cymru, gyflawni’r canlynol:
- Sicrhau ein bod yn gallu symud yn ddidrafferth i fodel gweithio o bell, a hynny heb aberthu ansawdd y gwasanaeth yr ydym yn ei ddarparu i’n cleientiaid.
- Cyflwyno Fframwaith Rheoli Perfformiad newydd i ganolbwyntio ar gyfraniad pob unigolyn i’r sefydliad, ynghyd â’i lesiant a’i ddatblygiad.
- Diweddaru pob swydd-ddisgrifiad i’n helpu i ddenu a chadw’r bobl iawn: pobl sy’n byw ein gwerthoedd.
Neges oddi wrth Aled Davies (Cyfarwyddwr Gwasanaethau Pobl)
Rydym y ffodus iawn bod gennym dîm gwych yn Hafan Cymru. Mae gennym weithlu ymrwymedig, hyblyg sy’n llawn cymhelliant ac sy’n gyson yn amlygu eu hangerdd dros ddiwallu anghenion cleientiaid. Maent wedi bod yn ystwyth ac yn barod i addasu’n gyflym dros ben i weithio hybrid, ac maent wedi delio â’r holl heriau personol a heriau yn y gwaith sydd wedi deillio o’r pandemig, a hynny mewn modd hynod o broffesiynol. Maent yn wych!
Wrth edrych ymlaen, ein nod yw mynd ymhellach trwy wella ymgysylltiad a llesiant y cyflogeion, ac i Hafan Cymru gael ei gydnabod yn Gyflogwr o Ddewis. Rydym am ddenu a chadw’r dalent iawn i’n galluogi i barhau i ddarparu’r gwasanaeth o ansawdd y mae ein cleientiaid yn ei haeddu.
Geiriau ein staff
“Mae fy rôl yn cynnwys cefnogi tenantiaid i symud ymlaen o dai â chymorth a dod o hyd i lety addas. Mae fy rôl yn amrywio yn dibynnu ar anghenion cymorth fy nghleientiaid; gallai gynnwys cyfeirio at asiantaethau perthnasol, cynnal sesiynau cerdded a siarad pan fo pethau’n peri straen, a chefnogi cleientiaid sydd â phroblemau ariannol, pa un a yw hynny’n golygu trefnu ar gyfer banc bwyd neu gysylltu ag asiantaethau allanol i helpu mewn adeg o argyfwng.
“Rwy’n mwynhau pob agwedd ar fy rôl; mae pob diwrnod yn wahanol. Rydych yn cael diwrnodau lle gallwch gynllunio eich calendr a blaenoriaethu eich llwyth gwaith, ac yna daw argyfwng i’r amlwg. Byddaf yn blaenoriaethu defnyddiwr fy ngwasanaeth cyn popeth arall. Rwy’n teimlo fy mod yn gweithio’n dda mewn argyfwng a’m bod wedi magu llawr o brofiad a sgiliau wrth weithio yn y sector iechyd meddwl am dros ddeng mlynedd, yn enwedig o ran negodi a gallu tawelu sefyllfaoedd gelyniaethus.
“Rwy’n ymfalchïo fwyaf yn fy ymrwymiad a’m hagwedd at waith wrth i mi helpu eraill. Ni chaf fwy o bleser mewn bywyd na phan fyddaf yn helpu eraill ac yn eu gwylio’n ffynnu, a dyna pam yr wyf wir yn mwynhau fy rôl.”
Kate Johnson
“Byddaf wedi gweithio gyda Hafan Cymru ers pum mlynedd ym mis Medi. Rwyf wedi cael cyfle i ddatblygu yn fy rolau ers i mi ddechrau gyda Hafan Cymru. Yn Rhondda Cynon Taf mae gennym gysylltiadau llwyddiannus ag amrywiaeth o asiantaethau o ganlyniad i’n prosiectau a’n cynlluniau. Mae’r rhain yn fy ngalluogi i roi cymorth i denantiaid a sicrhau eu bod yn cael y cymorth gorau posibl. Mae’r tîm wedi gweithio’n galed i feithrin perthnasoedd a thynnu sylw at y cymorth llwyddiannus yr ydym yn ei gynnig. Mae gennyf berthynas gadarnhaol iawn â’m cyd-weithwyr.
“Rwy’n cael fy nghefnogi’n eithriadol o dda gan uwch-weithiwr cymorth a rheolwr gweithredol Rhondda Cynon Taf. Mae’r cymorth a’r arweiniad y maent yn eu darparu wedi fy ngalluogi i ddatblygu fy sgiliau a’m gwybodaeth ymhellach, ac wedi bod yn hwb mawr i’m hyder yn fy rolau – gan fy ngalluogi i ddarparu’r cymorth gorau posibl i’n tenantiaid.”
Sophie Jones
Diolch a Chydnabyddiaethau
Firstly, we would like to thank our clients, for working with us to help improve our service and provide a holistic approach when engaging with future clients. Secondly, a massive thank you to staff past and present. Hafan Cymru’s excellent reputation is due to you. Thank you for all your hard work and support over the last year.
In addition, Hafan Cymru could not provide the excellent services it does without the support of our voluntary Board of Management who are listed below.
Aelodau’r Bwrdd:
John Morgan – Cadeirydd, Y Bwrdd Rheoli
Amie Chapman – Trysorydd
Stacey Anastasi
Kate Carr
Ffion Green
Steve Griffiths
Shone Hughes
Jack Mansfield
Steve Morgan
James Owens
Bill Walden-Jones
Richard Batt
Liz Evans
Steve Ray
Liane Sheppard
Diolch Arbennig
Paul Thorburn – Ambassador
Shirley Sansom – Honorary President
© Copyright 2021 Hafan Cymru | Website by Accent Creative
